ԵԲԱ-ն մասնակցեց ՀՀ Կառավարությունում կայացած Տեսչական բարեփոխումների համակարգման խորհուրդի հերթական նիստին

Երևան, հոկտեմբերի 20, 2017թ․ – Եվրոպական բիզնես ասոցիացիան մասնակցեց ՀՀ վարչապետի գլխավորությամբ կայացած տեսչական բարեփոխումների համակագման խորհրդի հերթական նիստին, որպես հրավիրված կազմակերպություն։

Եվրոպական բիզնես ասոցիացիայի խորհրդին անդամակցության հայտը գտնվում է հաստատման փուլում։

Խորհրդի քննարկմանն են ներկայացվել Առողջապահական տեսչական մարմնի և Բնապահպանության ու ընդերքի տեսչության բնականոն գործունեությունն ապահովող օրենսդրական փոփոխությունների փաթեթները, որոնք միտված են նշված մարմինների գործունեության կանոնակարգմանը: Այդ նպատակով փոփոխություններ և լրացումներ են կատարվելու համապատասխան օրենքներում և կառավարության որոշումներում: Քննարկումներից հետո վարչապետ Կարապետյանը հանձնարարել է Արդարադատության նախարարությանը լրացուցիչ ուսումնասիրել ներկայացված փաթեթները՝ գնահատելով հնարավոր ռիսկերն ու հաշվի առնելով ստանձնած միջազգային պարտավորությունների կատարման հարցը:

Անդրադարձ է կատարվել նաև «Տեսչական մարմինների մասին» ՀՀ օրենքում փոփոխություններ և լրացումներ կատարելու մասին ՀՀ օրենքի նախագծին, որով, ըստ զեկուցողների, հստակեցվում է որակի ապահովման համակարգի գործունեությունը: